கார் வாங்க யாரும் இல்லையா?

0
59

பிப்ரவரி மாதத்தில் கார் விற்பனையில் 8.77 சதவீதம் சரிவு ஏற்பட்டுள்ளது.

இந்தியாவின் உள்நாட்டு வாகன உற்பத்தி குறித்த விவரங்களை இந்திய ஆட்டோமொபைல் உற்பத்தியாளர்கள் கூட்டமைப்பு வெளியிட்டுள்ளது. அதன்படி, சென்ற பிப்ரவரி மாதத்தில் பயணிகள் வாகனங்கள் பிரிவில் மொத்தம் 2,51,516 வாகனங்கள் மட்டுமே விற்பனை செய்யப்பட்டுள்ளன. இது 2019ஆம் ஆண்டின் பிப்ரவரி மாதத்தில் விற்பனை செய்யப்பட்ட 2,72,243 வாகனங்களை விட 7.61 சதவீதம் குறைவாகும்.

கார் விற்பனையைப் பொறுத்தவரையில், 8.77 சதவீத வீழ்ச்சியுடன் 1,56,285 கார்கள் மட்டுமே பிப்ரவரி மாதத்தில் விற்பனை செய்யப்பட்டிருக்கின்றன. 2019 பிப்ரவரியில் விற்பனையான கார்களின் எண்ணிக்கை 1,71,307 ஆகும். மோட்டார் சைக்கிள் விற்பனையிலும் 22.02 சதவீத வீழ்ச்சி ஏற்பட்டுள்ளது. அதன் விற்பனை எண்ணிக்கை 2019 பிப்ரவரியில் 10,47,356லிருந்து 8,16,679 ஆகக் குறைந்துள்ளது. இருசக்கர வாகன விற்பனையில் 19.82 சதவீத வீழ்ச்சி ஏற்பட்டுள்ளது.

இந்த ஆண்டின் பிப்ரவரி மாதத்தில் மொத்தம் 12,94,791 இருசக்கர வாகனங்கள் மட்டுமே விற்பனையாகியுள்ளன. வர்த்தக வாகனங்கள் விற்பனை 32.9 சதவீதம் குறைந்து 58,670 யூனிட்டுகளாக இருக்கிறது. ஒட்டுமொத்தமாக பிப்ரவரி மாதத்தில் 16,46,332 வாகனங்கள் உள்நாட்டில் விற்பனை செய்யப்பட்டுள்ளன. 2019 ஜனவரியில் இதன் எண்ணிக்கை 20,34,597 ஆக இருந்தது என்பது குறிப்பிடத்தக்கது.

பொருளாதார மந்தநிலை காரணமாக கடந்த ஓராண்டுக்கும் மேலாகவே இந்திய ஆட்டோமொபைல் துறை கடினமான சூழலில் இயங்கிக் கொண்டிருக்கிறது. மக்களிடையே தேவை குறைந்துள்ளதால் ஒவ்வொரு மாதமும் வாகன விற்பனை வீழ்ச்சியடைந்து வருகிறது. அதோடு, கொரோனா பீதியால் சீனாவிலிருந்து வரும் உதிரிப் பாகங்கள் இறக்குமதி குறைந்து விநியோகச் சங்கிலி பாதிக்கப்பட்டுள்ளதால் வரும் மாதங்களிலும் விற்பனை வீழ்ச்சி தொடரும் என்று எதிர்பார்க்கப்படுகிறது.

LEAVE A REPLY

Please enter your comment!
Please enter your name here