இறுதிப் போட்டியில் ஆஸ்திரேலியா!!

0
66

மகளிருக்கான டி20 உலகக் கோப்பை கிரிக்கெட் தொடர் இறுதிக் கட்டத்தை எட்டியுள்ளது.

மகளிருக்கான டி20 உலகக் கோப்பை கிரிக்கெட் தொடர் ஆஸ்திரேலியாவில் நடைபெற்றுவருகிறது. பிப்ரவரி 21ஆம் தேதி தொடங்கிய இந்தத் தொடரின் இறுதிப் போட்டி மார்ச் 8ஆம் தேதி ஞாயிற்றுக் கிழமை நடைபெறவுள்ளது.

இந்தியா, ஆஸ்திரேலியா, இங்கிலாந்து, தென்னாப்பிரிக்கா ஆகிய அணிகள் அரையிறுதிப் போட்டிக்கு தேர்வாகியிருந்தன. இந்தியா, இங்கிலாந்து அணிகளுக்கிடையேயான அரையிறுதிப் போட்டி மழை காரணமாக கைவிடப்பட்டதுடன் புள்ளிகள் அடிப்படையில் இந்திய அணி இறுதிப் போட்டிக்கு தகுதி பெற்றதாக அறிவிக்கப்பட்டது.

சிட்னியில் தொடர்ந்து மழை பெய்து வந்ததால் ஆஸ்திரேலியா, தென்னாப்பிரிக்கா அணிகளுக்கிடையேனான ஆட்டமும் ரத்தாக வாய்ப்பு இருப்பதாக கூறப்பட்டது. ஆனால் வருண பகவான் வழிவிட்டதால் டாஸ் போடப்பட்டு தென்னாப்பிரிக்க அணி பந்து வீச்சைத் தேர்வு செய்தது.

ஆஸ்திரேலிய அணி வீராங்கனைகள் அல்ய்ஸா ஹேலி, பெத் மூனி ரன் வேட்டையைத் தொடங்கி வைத்தனர். இருவரும் தலா 4 பவுண்டரிகளை விரட்டினர். ஹேலி 18 ரன்களிலும், மூனி 28 ரன்களிலும் ஆட்டமிழக்க பின்னர் வந்த கேப்டன் மெக் லானிங் நிலைத்து நின்று ஆடி 49 ரன்கள் சேர்த்தார். 20 ஓவர்கள் முடிவில் அந்த அணி 5 விக்கெட்டுகள் இழப்புக்கு 134 ரன்கள் சேர்த்தது.

அதன்பின் மழை தொடர்ந்ததால் ஆட்டம் பாதிக்கப்பட்டது. மீண்டும் தொடங்கிய போது 13 ஓவர்களாக சுருக்கப்பட்டது. தென்னாப்பிரிக்கா அணி வெற்றி பெற 98 ரன்கள் இலக்கு நிர்ணயிக்கப்பட்டது.

இதனால் ஆரம்பம் முதலே அந்த அணி வீராங்கனைகள் அடித்து ஆட முற்பட்டனர். இருப்பினும் ஆஸ்திரேலிய வீராங்கனைகளின் பந்துவீச்சு அதற்கு முட்டுக்கட்டைப் போட்டது. ஒரு பக்கம் விக்கெட் விழுந்து கொண்டிருந்தாலும் லாரா நிலைத்து நின்று ஆடியதுடன் அதிரடி காட்டவும் தவறவில்லை. 27 பந்துகளைச் சந்தித்த அவர் 3 பவுண்டரிகள், 2 சிக்ஸர்களை பறக்கவிட்டு 41 ரன்களைச் சேர்த்து இறுதிவரை ஆட்டமிழக்காமல் இருந்தார்.

இருப்பினும் அந்த அணியால் வெற்றி இலக்கை எட்டமுடியவில்லை. 13 ஓவர்கள் முடிவில் தென்னாப்பிரிக்கா அணி 5 விக்கெட்டுகள் இழப்புக்கு 92 ரன்களை மட்டுமே எடுத்தது.

இதனால் ஆஸ்திரேலிய அணி இந்தியாவுடன் இறுதிப் போட்டியில் மோதவுள்ளது. ஏற்கெனவே இந்தத் தொடரின் முதல் லீக் போட்டியில் ஆஸ்திரேலியாவை இந்திய அணி வீழ்த்தியது. அதனால் ஞாயிற்றுக் கிழமை நடைபெறவுள்ள இறுதிப் போட்டியில் இந்திய அணி நம்பிக்கையுடன் களமிறங்கும். அதேவேளையில் அந்தப் போட்டிக்குப் பின் ஆஸ்திரேலிய அணி தோல்வியையே சந்திக்கவில்லை. தற்போது தென்னாப்பிரிக்காவை அந்த அணி வீழ்த்தியிருப்பதால் புத்துணர்ச்சியுடன் இறுதிப் போட்டியை சந்திக்கும். மேலும் சொந்த மைதானம் என்பது அந்த அணி வீராங்கனைகளுக்கு கூடுதல் பலம். இந்நிலையில் இறுதிப் போட்டியில் விறுவிறுப்புக்கு குறையிருக்காது.

LEAVE A REPLY

Please enter your comment!
Please enter your name here