ஃபீல்டிங்கில் சொதப்பிய இந்தியா: யுவராஜ் சிங் அதிருப்தி!

0
30

ஃபீல்டிங்கில் சொதப்பிய இந்தியா: யுவராஜ் சிங் அதிருப்தி!

இந்தியா சுற்றுப்பயணம் வந்துள்ள மேற்கிந்தியத் தீவுகள் அணி மூன்று ஒருநாள், மூன்று டி-20 போட்டிகள் கொண்ட தொடரில் விளையாடுகிறது. முதல் டி-20 போட்டி ஹைதராபாத்தில் நேற்று (டிசம்பர் 6) நடைபெற்றது. இப்போட்டியில் இந்திய அணி 6 விக்கெட் வித்தியாசத்தில் வெற்றி பெற்றது. முதலில் விளையாடிய மேற்கிந்தியத் தீவுகள் அணி 20 ஓவர்கள் முடிவில் 207 ரன்கள் எடுத்திருந்த நிலையில், 19ஆவது ஓவரிலேயே இந்திய அணி வெற்றி இலக்கை எட்டியது. கடைசி வரை களத்தில் நின்று 94 ரன்கள் குவித்து அணியை வெற்றிபெறச் செய்த இந்திய அணியின் கேப்டன் விராட் கோலிக்கு ஆட்டநாயகன் விருது வழங்கப்பட்டது.

ஃபீல்டிங் சொதப்பலால் ரன் குவிப்பு

நேற்றைய போட்டியில் இந்திய அணி வீரர்கள் வழக்கத்துக்கு மாறாக மிக மோசமாக ஃபீல்டிங் செய்தனர். குறிப்பாக கடைசி ஓவர்களில் கிடைத்த சுலப கேட்ச்களை நழுவவிட்டதால் மேற்கிந்தியத் தீவுகள் அணி 200 ரன்களுக்கு மேல் குவித்தது. ஆட்டத்தின் 16ஆவது ஓவரில் சிம்ரன் ஹெட்மையர் 44 ரன்களில் இருந்தபோது கொடுத்த சுலப கேட்சை வாஷிங்டன் சுந்தர் வீணடித்தார். இதனால் ஹெட்மையர் டி-20 போட்டிகளில் தனது முதல் அரைசதத்தைப் பதிவுசெய்தார். அதே ஓவரில் கீரான் பொல்லார்டு அடித்த பந்தை கேட்ச் பிடிக்காமல் ரோஹித் ஷர்மா நழுவவிட்டார். அது சிக்ஸராகவும் மாறியது. இறுதியில் கீரான் பொல்லார்டு அதிரடியாக 19 பந்துகளில் 37 ரன்கள் குவித்தார். கேப்டன் விராட் கோலியும் நேற்று ஃபீல்டிங்கில் சொதப்பினார். விக்கெட் கீப்பர் ரிஷப் பந்தின் கீப்பிங்கும் மோசமாகவே இருந்தது.

யுவராஜ் சிங் அதிருப்தி

இந்திய அணி வீரர்கள் ஃபீல்டிங்கில் சொதப்பியதற்கு இந்திய அணியின் முன்னாள் அதிரடி ஆலரவுண்டரும் உலகின் தலைசிறந்த ஃபீல்டர்களில் ஒருவருமான யுவராஜ் சிங் விமர்சனம் செய்துள்ளார். அவர் தனது ட்விட்டர் பக்கத்தில், இந்திய அணியின் ஃபீல்டிங் மோசமாக இருந்ததாகவும், இளம் வீரர்கள் களத்தில் மிக மந்தமாகச் செயல்பட்டதாகவும் குறிப்பிட்டுள்ளார். இந்திய அணியின் வெற்றி குறித்தும், குறிப்பாக கேப்டன் விராட் கோலியின் ஆட்டம் குறித்தும் விவியன் ரிச்சர்ட்ஸ் உள்ளிட்ட பலர் பாராட்டி வரும் நிலையில், இந்திய அணியின் ஃபீல்டிங் குறித்து யுவராஜ் சிங் வருத்தம் தெரிவித்துள்ளார்.

LEAVE A REPLY

Please enter your comment!
Please enter your name here