ஆஸ்திரேலிய கேப்டனுக்கு பதிலடி கொடுத்த கம்பீர்!!!

0
92

பகலிரவு டெஸ்ட் போட்டியில் விளையாட இந்தியா தயாராக இருக்கிறதா என்று கேட்ட ஆஸ்திரேலிய கேப்டன் டிம் பெய்னுக்கு கவுதம் கம்பீர் பதிலளித்துள்ளார்.

சமீபத்தில் நிறைவடைந்த வங்கதேச அணிக்கு எதிரான டெஸ்ட் தொடரில் விராட் கோலி தலைமையிலான இந்திய அணி 2-0 என்ற கணக்கில் வெற்றிபெற்றது. குறிப்பாக, வரலாற்றுச் சிறப்பு மிக்க பகலிரவு பிங்க் பந்து போட்டியில் இந்திய அணி அபார வெற்றி பெற்று புதிய உத்வேகத்தில் உள்ளது. இந்திய அணியின் பந்துவீச்சுக் கூட்டணி இத்தொடரின் வெற்றியில் முக்கியப் பங்கு வகித்தது.

இந்நிலையில், ஆஸ்திரேலிய டெஸ்ட் அணியின் கேப்டன் டிம் பெய்ன், இந்திய கேப்டன் விராட் கோலிக்கு பகிரங்க சவால் விட்டுள்ளார். ஆஸ்திரேலிய அணிக்கு எதிராக ஆஸ்திரேலியாவில் வைத்து பிங்க் பந்து டெஸ்ட் போட்டியில் விளையாடத் தயாரா என்று கோலிக்கு சவால் விடுத்தார். இதற்கு விராட் கோலி தரப்பிலிருந்து இன்னும் பதில் எதுவும் வரவில்லை.

டிம் பெய்னின் சவாலுக்கு இந்திய அணியின் முன்னாள் துவக்க ஆட்டக்காரரான கவுதம் கம்பீர் பதிலளித்துள்ளார். டிம் பெய்னின் சவாலுக்கு விராட் கோலி பின்வாங்கமாட்டார் எனவும், ஒருவேளை தான் இந்திய அணியின் கேப்டன் ஸ்தானத்தில் இருந்திருந்தால் டிம் பெய்னின் இந்த சவாலுக்குப் பதிலடி கொடுத்திருப்பேன் எனவும் கவுதம் காம்பிர் கூறியுள்ளார்.

இதுகுறித்து கவுதம் காம்பிர் பேசுகையில், “இந்திய கேப்டன் விராட் கோலிக்கு ஆஸ்திரேலிய அணியின் கேப்டன் டிம் பெய்ன் விடுத்துள்ள சவால் எனக்கு மிகவும் பிடித்துள்ளது. விராட் கோலியைப் பற்றி எனக்குத் தெரிந்தவரை, அவர் கண்டிப்பாக இந்த சவாலை ஏற்றுக்கொள்வார். அவர் ஒருபோதும் பின்வாங்குபவர் அல்ல.

ஒருவேளை நான் விராட் கோலியின் இடத்தில் இருந்திருந்தால் பகலிரவு டெஸ்ட் போட்டியில் விளையாடிக்கொண்டிருக்கும்போது, இந்திய வீரர்களின் குழந்தைகளைப் பார்த்துக்கொள்ளத் தேவையான வசதிகளைச் செய்துவைக்கும்படி அவர்களிடம் (ஆஸ்திரேலியா) கேட்டிருப்பேன். இப்போட்டி நடைபெற்றால் அது ஆஸ்திரேலிய அணிக்கு மறக்க முடியாத போட்டியாக இருக்கும்” என்று கூறியுள்ளார்.

சென்ற ஆண்டில் ஆஸ்திரேலியா சென்ற இந்திய அணி அப்போது பகலிரவு டெஸ்ட் போட்டியில் விளையாட மறுப்பு தெரிவித்துவிட்டது. வங்கதேச அணிக்கு எதிராகத்தான் தனது முதல் பகலிரவு டெஸ்ட் போட்டியில் இந்தியா களம்கண்டது. தலைசிறந்த பந்துவீச்சுக் கூட்டணியுடன் அபாயகரமான அணியாகத் திகழும் இந்திய அணி ஆஸ்திரேலிய மண்ணில் விளையாடுவது சற்று சவாலானதாகவே இருக்கும்.

ஸ்டீவ் ஸ்மித், டேவிட் வார்னர் அணிக்குத் திரும்பி சிறப்பாக விளையாடிவரும் நிலையில் இந்திய அணியின் பந்துவீச்சு அங்கு எடுபடுமா என்பதைப் பொறுத்திருந்தே பார்க்க வேண்டும்.

LEAVE A REPLY

Please enter your comment!
Please enter your name here