ஒன்ஸ் அப்பான் எ டைம் இன் ஹாலிவுட் (Once Upon a Time in Hollywood) மினி விமர்சனம்

0
40
நடிகர்கள்
லியோனார்டோ டிகாப்ரியோ,பிராட் பிட்,மார்கோட் ரொப்பி
இயக்கம்
குவெண்டின் டேரண்டினோ
கரு: வரலாற்றின் கருப்பு பக்கங்களை, தன் பார்வையில், சினிமா மொழியில் மாற்றி எழுதும் ஒரு முயற்சி தான் படம். அமெரிக்காவின் வரலாற்றில் மாறாத கொலைச் சம்பவமான Sharon Tate கொலைச் சம்பவத்தின் மையத்தில், 1960களில் ஹாலிவுட்டின் கதையை சொல்வது தான் கரு.

கதை: 1960 களில் ஹாலிவுட்டில் வசிக்கும் நடிகர் Rick Dalton அவரது ஸ்டண்ட் டூப் Cliff Booth இருவரும் ஹாலிவுட்டில் தங்கள் சினிமா வாழ்வின் அஸ்தமனத்தில் போராடிக் கொண்டிருக்கிறார்கள். Rick Dalton-னின் பக்கத்து வீட்டுக்கு குடிவருகிறார்கள் Roman Polanski -யும் அவரது மனைவி Sharon Tate-ம். Rick Dalton, Cliff Booth , Sharon Tate மூவருக்கும் ஹாலிவுட் என்ன மாதிரியான அனுபவங்கள் தருது, வரலாற்றில் மறையாத அந்த நாளில் என்ன நடக்கிறது என்பது தான் இந்தப்படத்தின் கதை.

விமர்சனம்: குவெண்டின் டேரண்டினோ. இந்தப் பெயர் உலக சினிமாவில் பிரசித்தம். சினிமா ரசிகர்கள், ஆர்வலர்கள், சினிமா பயில்பவர்கள் என பலரின் ஆதர்சம். இவருக்கென ஒரு தனி திரைமொழியை உருவாக்கி வைத்துள்ளார், நான் லீனியர் கதை சொல்லலில் பிதாமகன் எனலாம். படத்தை தனித்தனியே பிரித்து அங்கங்களாக பகுதிகளாக கலைத்துப் போட்டு கதை சொல்வது இவரது ஸ்டைல். சிறு வன்முறை அதீதமாக பார்க்கப்பட்டபோது, அதீத வன்முறையை திரையில் அழகியலாக்கி வைத்தவர்.

இத்தனை வரலாறும் இந்தப் படத்தின் பார்வைக்கு வெகு முக்கியமாகிறது. ஆகஸ்ட் 6, 1969 அமெரிக்காவில் Sharon Tate உட்பட 7 பேரை மேன்சன் ஃபேமிலியை சேர்ந்த ஹிப்பிக்கள் கொலை செய்த நாள். அப்போது அவர் 8 மாத கர்ப்பிணியாக இருந்தார். இந்த நாளை நோக்கி தான் இந்தப்படம் செல்கிறது. இந்த வரலாறெல்லாம் இந்தப்படம் பார்ப்பதற்கு சற்றே அவசியமாகிறது.

குவெண்டின் டேரண்டினோ தன் பாணியை விட்டுவிட்டு வரலாற்றின் பக்கத்தில் தான் பணிபுரியும் ஹாலிவுட்டை தன் பார்வையில் படைத்திருகிறார். அதனூடே வரலாற்றின் பக்கத்தில் தன் அன்புக்கதையை எழுதியுள்ளார். மேன்சன் ஃபேமிலி கொலைகாரர்கள் படம் முழுக்க வருகிறார்கள். ஆனால் அவர்கள் அல்ல இப்படத்தின் கதை. Rick Dalton, Cliff Booth , Sharon Tate இந்த மூவரின் வாழ்க்கையின் சில பகுதிகளை அவர்களின் மன வழியில் சொல்லிச் செல்கிறது இந்தப்படம். அதில் ஒவ்வொரு ஃபிரேமிலும் Quentin Tarantino நிறைந்திருக்கிறார்.

Rick Dalton தன் பிரபலயத்தின் அந்திம காலத்தில் நண்பனுடன் வெளிச்சம் தேடி பயணிக்கிறார். Cliff Booth ஹாலிவுட்டில் ஸ்டண்ட்மேன்களின் நிச்சயமற்ற வாழ்க்கையை பிரதிபலித்திருக்கிறார். ஒரு நண்பனாக அவரின் பாத்திரம் பல இடங்களில் அதிர வைக்கிறது. Sharon Tate மின்மினி பூச்சியாக ஜொலிக்கிறார். சிறகடிக்கும் பட்டாம்பூச்சி வாழ்க்கையை அவர் வாழ்கிறார். இவர்களது வாழ்வின் பக்கங்கள் ஒன்றன் பின் ஒன்றாக ஹாலிவுட் வாழ்க்கையையும் அமெரிக்க கலாச்சாரத்தையும் திரையில் பதிக்கிறது.

Rick Daltonனாக லியோனார்டோ டிகாப்ரியோ, தன் வாழ்வில் அதி அற்புத நடிப்பை தந்துள்ளார். சிறு குழந்தையுடைய நடிப்பு பற்றிய அவரது உரையாடலும், அதையொட்டிய காட்சிகளும், முடிவில் அவர் தரும் ரியாக்க்ஷன்களும் வரலாற்றில் இடம்பெறும்.

Cliff Booth தாக பிராட் பிட் ஸ்டண்ட்மேனாக bruce lee யை அடித்து நொறுக்கி, இறுதிக்காட்சிகளில் நடக்கும் வன்முறைகளில் கலக்கியிருக்கிறார். ஸ்பான் ரேஞ்ச்சிற்கு அவர் செல்லும் இடமும் அங்கு அவரது நடிப்பும் அட்டகாசம். Sharon Tate ஆக மார்கோட் ரொப்பி இதில் அதிகம் குறிப்பிடும் படியான பகுதி நடிப்பு இல்லை. Sharon Tate வாழ்வு இதில் அழகாக மாற்றி எழுதப்படுகிறது.

வன்முறை அதிகம் இல்லை, பகுதிகளாக பிரியும் திரைக்கதை இல்லை. ஆனால் இவையெல்லாம் வேறு வகையில் இருக்கிறது. குவெண்டின் டேரண்டினோ படங்களில் பொங்கும் அவல நகைச்சுவை இப்படத்திலும் நிறைந்து இருக்கிறது. Cliff Booth ஐ லிங்கனை கொன்ற John Wilkes Booth தோடு ஒப்பிடுவது அபாரம். bruce lee யின் வாய்ச்சவடால் கிழிக்கப்படும் இடம், இறுதிக்காட்சியின் வரலாற்று வன்முறை, Rick Dalton டனின் வழி அமெரிக்க திரைக்கதைகளின் கிண்டல்கள் என அத்தனையிலும் தன் முத்திரை பதித்துள்ளார். ஒரு காட்சி மிக மெதுவாக ஆரம்பித்து, மனமெங்கும் இதய துடிப்பை அதிர வைத்து, எதிர்பாராதவிதமாக முடியும் திரைக்கதையை இதிலும் வைத்து அட்டகாசப்படுத்தியுள்ளார். ‘

இவரது படங்களில் 60 களின் இசையை எடுத்து பயன்படுத்துவார். இப்படத்தில் கதையே 60 கள் என்பதால் பல இடங்கள் பிரமிப்பின் உச்சம். படம் முழுதும் விரவிக்கிடக்கும் பாடல்கள், காட்சிகளின் பயத்தை இசையின் மூலம் நரம்புகளில் மீட்டியிருக்கிறார். காட்சிக் கோர்வைகள் அனைத்தும் ஃபிலிமில் எடுத்த படத்தின் அபார வரலாற்று ஞாபகங்களை கிளறிக்கொண்டே இருக்கிறது. ஒரு படத்தால் என்னவெல்லாம் முடியும் எனும் சாத்தியங்களை மாற்றி வரலாற்றின் மீது தன் கதையை தைரியமாக எழுதிய கலைஞனின் பதிப்பு தான் ஒன்ஸ் அப்பான் எ டைம் இன் ஹாலிவுட்(Once Upon a Time in Hollywood).

பலம்: அபாரமான திரைக்கதை, நடிகர்களின் பங்களிப்பு, துல்லியமான உருவாக்கம்.

பலவீனம்: படத்தின் நீளம்.

இறுதியாக – சாத்தியங்களை திரை வழியே மாற்றிக்காட்டி வரலாற்றை திருப்பும் அன்பின் மொழி இந்தப்படம்.

LEAVE A REPLY

Please enter your comment!
Please enter your name here